Blog Vs Block!

“Block” .. الاختراع العظيم اللي بيريحك من شخصية رخمة بتكلمك على الماسينجر..

“Blog” .. الاختراع (العظيم برضه) اللي بيرحك من همومك و تحب تتكلم معاه كتير .. حتى لو هتخلي اللي انت قلتهوله draft.. ما حدش غيرك هيقراه..

من كام سنة (سنتين تقريبا) كان أخويا بكر بيكلمني أونلاين و خنقني أوي و كنت مشغول ..
كان بيتكلم في حاجات تافهة (عادي إخوات و بيغلسوا على بعض) .. المهم آخرة الخنقة رحت قلت له :
“You are Blocked now”!
فضلنا نضحك عليها كتير بعديها..

بعد ما عملت البلوج لقيت فوق خالص حاجة اسمها “Blog this” -للي مشتركين على blogger.com بتاع جوجل بس- ، و معناها اعمل بلوجاية (تدوينة) عن الموضوع ده..

و ساعتها عملت في دماغي مقارنة سريعة بين الجملتين دول :

- “You are BLOCKED now”
- “You are BLOGGED now”

الأولى: معناها حد مش طايقك، على الأقل ساعتها .. أو بيتهرب منك .. أو مش فاضي لك..

التانية : معناها حد مهتم جدا بيك .. أنت عنده تستحق كل لحظة بيضيعها في التفكير فيك ..

الأولى: قاسية .. و مش حلوة
التانية: رقيقة و كلها معاني حلوة

الاتنين صحيح بيتكونوا من 16 حرف و تلات مسافات، بس معناهم النقيض!

بس خلاص..